Аймгийн Иргэдийн Төлөөлөгчдийн Хурлын Тэргүүлэгчид өнөөдөр /2016.07.06/ хуралдлаа. Хурлаар аймгийн ИТХ-ын хуралдааны тов зарлах тухай, түгээмэл тархацтай ашигт малтмалын хайгуулын зориулалтаар олгох газрын тухай, төрийн одон медалиар шагнах иргэдийг Монгол Улсын Ерөнхийлөгчид уламжлах тухай, Дархан-Ус суваг ОНӨХК-ний өвөлжилтийн бэлтгэлийг хангах зэрэг дөрвөн асуудлыг хэлэлцэж, шийдвэрлэлээ.

Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн 20 дугаар зүйлийн 20.1.1, 23 дугаар зүйлийн 23.4 дахь заалтуудыг үндэслэн, аймгийн Иргэдийн Төлөөлөгчдийн Хурлын 7 дахь удаагийн сонгуулийн Анхдугаар хуралдааныг 2016 оны 07 дугаар сарын 19-ний өдөр буюу хуулийн хугацаанд нь багтаан хуралдуулахаар, тов зарлаж, хэлэлцэх асуудлуудыг баталлаа. Тус хуралдаанаар дараах асуудлыг хэлэлцэнэ. Үүнд:

Аймгийн ИТХ-ын сонгууль явуулсан дүн

Шинээр сонгогдсон төлөөлөгчдийн бүрэн эрхийг зөвшөөрөх тухай

Аймгийн ИТХ-ын даргыг сонгох тухай

Аймгийн ИТХ-ын Тэргүүлэгчдийн тоог тогтоож, Тэргүүлэгчдийг сонгох тухай

Аймгийн Засаг даргад нэр дэвшүүлэх тухай асуудлууд багтаж байна.

Үүнээс гадна хурлаар түгээмэл тархацтай ашигт малтмалын хайгуулын зориулалтаар олгох газрын тухай асуудлаар холбогдох мэргэжилтнүүд танилцуулага хийв. Энд Дархан-Уул аймгийн нутагт түгээмэл тархацтай ашигт малтмал ашиглах зориулалтаар газар хүссэн таван аж ахуйн нэгжийн долоон нэгж талбар бүхий газарт ашигт малтмалын хайгуулын тусгай зөвшөөрөл олгох боломжтой хэмээн Ашигт малтмалын газрын, Кадастрын хэлтэс дүгнэжээ. Тухайлбал: Орхон суманд нийт 188 га, Хонгор, Дархан суманд нийт 372,7 га, Шарын гол суманд нийт 629,1 га талбайг түгээмэл тархацтай ашигт малтмалын хайгуулын зориулалтаар олгох боломжтой гэж үзсэн байна. Аймгийн Засаг даргаас оруулсан тус асуудлыг хэлэлцээд аймгийн газар зохион байгуулалтын 2016 оны төлөвлөгөөнд түгээмэл тархацтай ашигт малтмалын хайгуулын зориулалтаар олгох газрын байршил, зориулалтыг тодотгон баталлаа.

Мөн Дархан хот үүсэн байгуулагдсаны 55 жилийн ойг тохиолдуулан хамт олон, дээд газар, аймаг, сумын Засаг дарга, ИТХ-ын Тэргүүлэгчдээс тодорхойлогдож дэмжигдсэн тус аймгийн Төрийн захиргаа, боловсрол, биеийн тамир спортын салбарт олон жил үр бүтээл, идэвхи зүтгэл гарган ажилласан 29 иргэнийг аймгийн ИТХ-ын Тэргүүлэгчдээс дэмжиж Төрийн одон медалиар шагнуулахаар Монгол Улсын Ерөнхийлөгчид уламжиллаа. Үүнд: Гавьяат жүжигчин цол тэмдгээр нэг, Хөдөлмөрийн гавьяаны улаан тугийн одонгоор гурав, Цэргийн гавъяаны улаан тугийн одонгоор нэг, Алтан гадас одонгоор 14, Хөдөлмөрийн хүндэт медалиар 10 хүнийг тус тус шагнуулахаар уламжлав.

Өнөөдрийн хурлаар хэлэлцэгдсэн сүүлийн асуудал нь "Дархан-Ус суваг” ХК-ийн өвөлжилтийн бэлтгэлийг хангах, тус байгууллагын үйл ажиллагааг хэвийн явуулахад дутагдаж байгаа хөрөнгийн эх үүсвэрийг банкны зээлээр санхүүжүүлэх тухай асуудлыг хэлэлцэн дэмжлээ.