Монголд аялаж явсан Их Британийн нисэгч дээрэмдүүлэн амиа алджээ

Их Британийн парапланы нисэгч Стив Нэш нисэх аяллаа хийж явахдаа Архангай аймгийн нутаг дэвсгэрт бусдын гарт амиа алджээ.

53 настай тамирчин "Spiralling the Steppes 2” хэмээх энэхүү аяллаа өөрийн найз Гарет Эстонтой хамтран хийж байсан ч Гаретын шарх сэдрэн Стив цааш ганцаараа явсан байна.

Тэд нийт 400 км аялах төлөвлөгөөтай байсан бөгөөд аяллынхаа хагас замыг туулж Улиастай хотоос Архангай аймгийн Цэцэрлэг сум орохоор төлөвлөж байжээ.

Гэвч удалгүй Стивийн байршил тогтоогч нь шинэчлэл хийхээ больж, нэг газраа маш удаан байх болсныг Их Британиас түүний эхнэр болон найз Малкольм Грэйс нар харсан байна. Энэхүү байршил тогтоогч нь минут тутамд шинэчлэгддэг аж. Үүнээс хэдхэн цагийн дараа хамт явсан гэх Гаретаас "Стив пасспорт болон мөнгөө дээрэмдүүлж амиа алдсан” тухай мэдээг хүлээн авчээ.

Стив өмнө нь 2006 онд Монголд ирж нислэг үйлдэж байсан бөгөөд энэ удаа өөрийн найз Гаретын хамт ирж Хангайн нуруунд хүрэхээр гарсан юм байна.

Энэ хэрэгтэй холбогдуулан Монгол Улс дахь Их Британийн Элчин сайдын яам "Бид Их Британийн үндэсний бэлгэ тэмдэг болсон тамирчнаа нас барсантай холбоотойгоор түүний гэр бүлд энэ хүнд цагийн даван гарахад нь дэмжлэг үзүүлж, туслахаар Монгол Улсын удирдлагуудтай холбоотой ажилаж байна” хэмээжээ. Харин Монголын цагдаагийн газраас шалгаж байгаа хэмээн мэдээллээ.

Талийгаачийн цогцосыг ирэх долоо хоногт нутагт нь хүргэх юм байна. Түүнчлэн Стив Нэшийн дурсгалд зориулж Их Британид Just Giving цахим хуудсаар дамжуулан "Wings for Life” аяныг эхлүүлжээ. Уг аянаар Стивийн нас барсанд гашуудан харамслаа илэрхийлэхийн хажуугаар энэ төрлийн спортоор хичээллэгч тамирчдын эрүүл мэндийн төлөө мөнгөн хандив цуглуулах болжээ.

Мэдээллийн дэлгэрэнгүйг: http://www.xcmag.com/2016/09/steve-nash-1962-2016/