Иргэд ингэж зээлээ чөлөөлнө

Монгол Улсын Ерөнхийлөгч Х.Баттулга мөрийн хөтөлбөртөө иргэдийн зээлийг тодорхой хувиар тэглэх, зээлийг чөлөөлөхөө амласан. Амлалтыг биелүүлэх хүрээнд УИХ дахь АН-ын бүлгээс ажлын хэсэг байгуулжээ.

УИХ-ын гишүүн, төсвийн зарлагын хяналтын дэд хорооны дарга З.Нарантуяагаар ахлуулсан ажлын хэсэг байгуулагдсан байна. Энэ асуудлаар ч мөн өчигдөр АН-ын бүлэг хэлэлцжээ.

Иргэдийн зээлийн тодорхой хувийг чөлөөлөхдөө нэг дор бус урт хугацаанд энэ ажлыг зохион байгуулах ёстой гэж үзэж буй аж. Ажлын хэсэг ямар оновчтой шийдэл байгаа талаар судалгаа, шинжилгээ хийж буй юм байна.

Засгийн газрын өнөөдрийн хуралдаанаар "Эрдэнэт” үйлдвэрийн 49 хувийг Монгол Улсын иргэн бүрт хувьцаа болгож өгөх шийдвэрийг гаргалаа.

Эрдэнэтийн 49 хувийг 100 хувь төрийн мэдэлд авч, төрийн өмчийнх болгох асуудлыг бүрэн шийдэж дуусгах шийдвэр гарч холбогдох яамдын сайд, агентлагийн дарга нарт үүрэг өгсөн байна.

Эрдэнэт үйлдвэрийн дээрх хувьцаанаас нийт ард иргэдэд хувь эзэмшүүлэх шийдвэр гарч, энэ ажлыг яаралтай зохион байгуулахыг холбогдох сайд нарт даалгажээ.

"Монгол Улсын Засгийн газрын 2016-2020 оны үйл ажиллагааны хөтөлбөрт стратегийн орд газруудаас хувь, хишиг хүртээх боломжийг ард түмэндээ олгож хэрэгжүүлнэ гэсэн зорилт албан ёсоор хэрэгжиж эхэллээ.

УИХ-ын 2017 оны 23-р тогтоолоор Эрдэнэт үйлдвэрийг 100 хувь төрийн мэдэлд авахыг үүрэг даалгавар өгсөн ч 49 хувийг эзэмшиж байсан байгууллага нь эсэргүүцэн шүүхэд хандсан. Шүүх Эрдэнэт үйлдвэрийг 100 хувь төрийн мэдэлд авсан Засгийн газрын шийдвэрийг буруутгасан шийдвэр гарсан. УИХ-ын дарга М.Энхболд ч 2017 оны 23-р тогтоолыг хэрэгжүүлэх тал дээр Засгийн газарт үүрэг даалгавар өгсөн. Энэ зарчмын дагуу асуудлыг шийдэж, Монгол Улсын иргэн бүр Эрдэнэт үйлдвэрээс хувь эзэмшихээр боллоо” гэж Монгол Улсын сайд, Засгийн газрын Хэрэг эрхлэх газрын дарга Ж.Мөнхбат мэдээллээ.

http://news.gogo.mn/r/210851