|

Уучлаарай бүсгүй минь, ТАСАРСАН БАЯЧУУД цаашаа шүү

Харахад нүдэнд дулаахан, сайхан гэхгүй ч цаанаа л нэг намбалаг бүсгүй. Зөөлөн ярихыг нь чих тавин чагнамаар. Гэхдээ л түүний тухай хоёр ч нэвтрүүлгийг дуустал нь чагнасан хэрнэ Монголынхоо тийм зүйлийг тэгж өөрчилнө гэх ч юм уу, Баян хоосны ялгааны тухай, эсвэл хүүхдийн эрх зөрчигдөж байгаа талаар, ер нь л ард иргэд, нийт массын хүсэн, хүлээж байгаа зүйлийн талаар юу ч сэтгэлд үлдсэнгүй...

Баян хүн хэзээ ч ядуу хүний зовлонг мэдэрч, тэдний төлөө нойр хоолоо умартан ажилладаггүйн тод жишээг Монголчууд сонгууль бүрийн дараа харсаар одоо хэнийг сонгохоо мэддэг болсон яг ийм цаг үед "ТАСАРСАН БАЯЧУУД” бол ёстой ЦААШАА шүү. АН-аас СХД-т нэр дэвшиж байгаа Б.Пунсалмаа хэрэв бидний ижил, эсвэл арай дээгүүр нэгэн байсан бол ёстой л 2 гараа өргөн дэмжихээр байлаа. Гэтэл тэрээр жилд 85 тэрбум төгрөгийн орлоготой. Тэр 85 бол зөвхөн өөрийнх нь. Тэгвэл өрхийнх нь орлого 83 тэрбум 913 сая төгрөг гэж мэдүүлснийг нь хэвлэлүүд онцолсон байв. Унаа, хөтөлгөө хөлгүүд нь гэхэд л 470 сая төгрөгийн үнэлгээ бүхий "Land Rover”, "Range Rover” тус бүр нэгтэй, "Porshe Boxter” маркийн 1 автомашинтай, 40 сая төгрөгөөр үнэлэгдсэн газартай гэж байгаа.

Мөн тэрээр олонд ил болсон

  1. "Их монгол Товер” ХХК,
  2. "Эм Пи” ХХК,
  3. "М-Ойл” групп ХХК,
  4. "Инвестос” ББСБ ХХК,
  5. "Монгол-Ойл групп” ХХК,
  6. "Рандоехорс”ХХК,
  7. "СирклЧейн” ХХК,
  8. "СмартВорк” ХХК,
  9. "Монгол Артист Пикчерс”
  10. ХХК, "НЬЮ-Истан” ХХК,
  11. "Тайширын Хүдэр” ХХК

гэх зэрэг компаниас хувь эзэмшдэг буюу хувьцаатай.

Зөвхөн өнгөц энэ мэдээллээс харахад тэрээр ХОМ-ээрээ дээгүүрт бичигдэх нь ойлгомжтой. Олны танил бус, ийм их хөрөнгөтэй хэрнэ нийгмийн төлөө, нийгмийн хариуцлагынхаа хүрээнд тэр юу хийсэн юм бэ... Монголчууд "Сүүнд халсан хүн тараг үлээнэ” гэх сайхан үгсийг амьдралд ишлэл болгож хэрэглэсээр ирсэн. Утга нь бол "Зовлон үзсэн хүн л зовлонг ойлгодог” тухай юм. Тэгвэл үүн лугаа адил ядуусын амьдралаар нэг цаг боловч амьдарч үзээгүй, ядуусын хороололд нэг өдрийн хугас болж үзээгүй, товчхондоо бол Монгол Улсынхаа төлөө цохилох зүрхгүй, Банк бус санхүүгийн байгууллагатай буюу мөнгө хүүлэгч яг ийм нөхдийг бид сонгохгүй. Өнөөдөр Монголчуудын амьдрал банк, ломбард, Банк бус санхүүгийн байгууллагын хүүнд дарлуулснаас өдрөөс өдөрт доройтож байгаа. Таван өрх тутмаас зээлтэй эсэхийг асуухад тавуулаа банк, эсвэл ломбард, банк бусаас, эсвэл "ЗЭЭЛ ЧӨЛӨӨЛНӨ” гэсэн луйварчдаас зээл авсан байдаг юм. Тийм болохоор ядуучуудын арми энэ удаад Банк бус санхүүгийн байгууллагатай, "ТАСАРСАН БАЯН” нөхдийг сонгохгүй гэх уриатай байгааг уламжилъя. Ард түмний амьдрал орж үзээгүй болохоорэнэ уриаг сонсоогүй нь мэдээж. Тиймээс уучлаарай, ТА ЦААШАА шүү.

С.Цээл

Эх сурвалж: еrennews.mn