2023/05/08 12:29
319 
The Diplomat-д нийтлэгдсэн Монголын тухай нийтлэлийг орчуулан хүргэж байна.
Польшийн Ерөнхийлөгч Анжей Дуда дөрөвдүгээр сарын 24-26-нд Монгол Улсад төрийн айлчлал хийв. Европын Аюулгүй байдал, хамтын ажиллагааны дарга, Польшийн Гадаад хэргийн сайд Збигнев Рау 2022 онд Монгол Улсад айлчлах үеэрээ Польшийн Ерөнхийлөгчийн айлчлал нэлээд удаан хугацаанд хойшлогдож байгааг мэдэгдэж байсан юм. Польшийн Ерөнхийлөгчийн Тамгын газрын Олон улсын бодлогын хэлтсийн дарга Марчин Пржыдах Монгол, Польш хоёр улс газар зүйн хувьд алслагдсан хэдий ч хоёр орон газарзүйн болон геополитикийн чухал байр суурьтайг онцолж байв. Айлчлалын үеэр Польшийн Ерөнхийлөгч Монголын ардчиллыг өндрөөр үнэлж, Украинд үргэлжилж буй мөргөлд+өөнийг шийдвэрлэхэд Монгол Улс ямар үүрэг гүйцэтгэж болохыг онцлон тэмдэглэв. Дуда "Польш улс дотооддоо ардчиллыг бий болгох төдийгүй дэлхийн энх тайван, аюулгүй байдлыг хангахад чиглэсэн Монгол Улсын хүчин чармайлтыг олон жилийн турш үнэлж ирсэн. Монгол Улс, Польш улс 70 гаруй жил дипломат харилцаатай байгаа. Хоёр улсын худалдааны эргэлт ойролцоогоор 100 сая ам.доллар болсон. Хоёр талын худалдааны дийлэнх хувийг ноос ноолуур, сүлжмэл бүтээгдэхүүн, жимс жимсгэнэ, хүнсний ногоо, өргөн хэрэглээний бараа, барилгын материал эзэлж байна. Эдгээр барааг ихэвчлэн Польшоос импортлодог” гэв.
Польш, Монгол хоёрыг гишүүнээр элссэн Европын аюулгүй байдлын хамтын ажиллагааны байгууллага нь хоёр орны харилцааг улам ойртуулж байна. ЕАБХАБ нь Европ, Америк, Азийн нийт 57 гишүүнтэй бүс нутгийн томоохон байгууллагуудын нэг юм. 2004 онд Монгол Улс ЕАБХАБ-тай хамтран ажилласан Азийн тав дахь орон болсон. Арав орчим жил хүчин чармайлт гаргасны эцэст Монгол Улс 2012 оны арваннэгдүгээр сард ЕАБХАБ-ын Зүүн Ази дахь анхны бүрэн эрхт гишүүн орон болсон. ЕАБХАБ-ын Ерөнхий нарийн бичгийн дарга 2006, 2012 онд Монгол Улсад айлчилж, төрийн тэргүүн, Засгийн газрын тэргүүн, зарим сайд нартай уулзсан нь ЕАБХАБ-тай хамтран ажиллахад түлхэц болсон.
Монгол Улсын парламентын гишүүд ЕАБХАБ-ын Парламентын Ассамблейн хуралдаанд тогтмол оролцдог. 2022 оны хоёрдугаар сараас хойш Орос, Украины зөрчилдөөн нь ерөнхийдөө ЕАБХАБ-ыг тэр дундаа Украинтай хиллэдэг Польшийн хувьд ихээхэн түгшүүр төрүүлэх болсон билээ. ЕАБХАБ болон Европын олон орон гишүүн орнууд нэгдэж, хүндрэл бэрхшээлийг даван туулахыг уриалсан. 2022 онд Орос-Украины мөргөлдөөнтэй холбоотой Европын дипломат арга хэмжээний хүрээнд Европын орнуудын олон сайд, төлөөлөгч Монголд айлчилсан. Польшийн Гадаад хэргийн сайд, ЕАБХАБ-ыг 2022 онд даргалж байсан Збигнев Рау айлчлалынхаа үеэр Монгол-Польш, Монгол-ЕАБХАБ-ын харилцаанд ЕАБХАБ-ын хамтын ажиллагаа чухал болохыг онцлон тэмдэглэв. Ерөнхийлөгч Дуда айлчлалынхаа үеэр Монгол, Польш улсууд Оросын түрэмгийллийн улмаас аюул заналхийлэлд өртөж байна хэмээсэн. Тэрээр "хуулийн засаглал гэхээсээ илүү хүч хэрэглэхэд суурилсан ертөнц ямар байдгийг хоёр улс өөрийн туршлагаасаа сайн мэднэ” хэмээсэн.
Монгол Улсын Ерөнхийлөгч Ухнаагийн Хүрэлсүх Польш болон Европын бусад оронд айлчилж, сүүлийн үеийн Монгол-Европын дипломат харилцааг үргэлжлүүлэх бололтой. Оросуудын түрэмгийлэл эхэлснээс хойш дэлхийн 50 гаруй удирдагч Украинд айлчилжээ. Энэ хямралын улмаас одоогоор Украин руу онгоцоор зорчиход хүндрэлтэй байгаа юм. Удирдагчид Польшоор дамжин Украинд галт тэргээр очиж буй. Дуда өнгөрсөн хугацаанд дайнд нэрвэгдсэн Украины бүс нутагт дөрвөн удаа айлчилжээ.
Польшийн Ерөнхийлөгч саяхан хийсэн айлчлалынхаа үеэр Украины нөхцөл байдлын талаар У.Хүрэлсүхтэй хуваалцсан байх. Түүнчлэн Хүрэлсүх 2017-2021 онд Ерөнхий сайдаар ажиллах хугацаандаа мөргөлдөөнтэй газруудаар явж туршлага хуримтлуулсан бол 2019 онд иргэний дайн болж буй Өмнөд Суданд айлчилж, Монголын энхийг сахиулах ажиллагааны бие бүрэлдэхүүнтэй уулзсан. Мөргөлдөөн эхэлснээс хойш Монгол Улсын Ерөнхийлөгч асан Ц.Элбэгдорж Украинд айлчилж байсныг онцлох хэрэгтэй. Монгол Улс амар амгаланг эрхэмлэдэг орон. Өнгөрсөн хугацаанд Улаанбаатар бусад хямралын үед, тухайлбал, Солонгосын хойгийн хямралыг шийдвэрлэх яриа хэлэлцээг Улаанбаатарт зохион байгуулах зэрэгт мөргөлдөөнтэй талуудын хооронд зуучлагчийн үүрэг гүйцэтгэхийг оролдсон. Хэдийгээр энхтайван, гал зогсоох хэлэлцээрт зуучлагчийн үүрэг гүйцэтгэх нь Монгол Улсын гадаад бодлогын нэн тэргүүний зорилт биш ч Монголын улс төрийн элитүүд Орос, Украинтай хувийн харилцаатай байдаг. Гадаадад суралцсан Монгол Улсын дөрвөн Ерөнхийлөгчийн хоёр нь одоогийн Орост, нөгөө хоёр нь Украинд боловсрол эзэмшсэн (Элбэгдорж Львовын Цэрэг улс төрийн дээд сургуульд, Багабанди Одессын үндэсний хүнсний технологийн дээд сургуульд).
Түүнчлэн, хуучин ЗХУ-ын үед эдгээр чиглэлээр боловсрол эзэмшсэн олон элитүүд Украины хямралын талаар санаа зовж байгаагаа илэрхийлсээр байна. Украины Ерөнхийлөгч Владимир Зеленский өөрөө Монголтой ихээхэн холбоотой. Тэрээр хүүхэд байхдаа эцэг эхийнхээ хамт Монголын хойд хэсэгт орших аж үйлдвэрийн Эрдэнэт хотод дөрвөн жил амьдарч байжээ. Хоёрдугаар сарын 21-нд Зеленскийн хүсэлтээр Хүрэлсүх Украины Ерөнхийлөгчтэй утсаар ярьсан. Энэ нь сөргөлдөөнд оролцогч талуудтай найрсаг харилцаатай Монгол Улс ямар нэгэн хэлбэрээр гал зогсоох хэлэлцээрийг Улаанбаатарт хийж болзошгүйг харуулж байна. Хөрш Хятад улс мөн хоёрдугаар сард энхийн замаар гал зогсоох 12 зүйл санал болгосон бөгөөд БНХАУ-ын дарга Ши Жиньпин саяхан Зеленскийтэй утсаар ярьсан.
https://itoim.mn/a/2023/05/08/about-us/ktj
Шинэ мэдээ
Их уншсан
Сэтгэгдэл
