Дархан-Уул аймгийн ИТХ-ын 7 дахь удаагийн сонгуулийн анхдугаар хуралдаанаар аймгийн Засаг даргад С.Насанбатыг нэр дэвшүүлж саналыг тогтоолын хамт Монгол улсын Ерөнхий сайдад уламжилсан билээ.

Тогтоолыг МУ-ын ерөнхий сайд Ж.Эрдэнэбат хүлээн авч Монгол Улсын Үндсэн хуулийн 60 дугаар зүйлийн 2 дахь хэсэг, Засаг захиргаа, нутаг дэвсгэрийн нэгж, түүний удирдлагын тухай хуулийн 26.3-т заасныг тус тус үндэслэн долоодугаар сарын 20-ны өдөр Сундуйжавын Насанбатыг Дархан-Уул аймгийн Засаг даргаар томилсон байна.

Иймээс өмнөх Засаг даргаар ажиллаж байсан Агвааны Энхболд, Сундуйжавын Насанбатад тамга, тэмдгээ хүлээлгэн өгч их ажлыг хийж бүтээхийг хүсэн ерөөлөө.

Ажлаа өнөөдөр хүлээн авсан аймгийн Засаг дарга С.Насанбат хэлэхдээ: "Наадмын дараа намар гэдэгчлэн өвөлжилтийн бэлтгэл ажлыг эн түрүүнд анхаарах ёстой. Мөн Монгол Улсын Төсвийн тухай хуулийн хүрээнд төсвийн дунд хугацааны мэдэгдлүүд явагддаг цаг үе. Иймд 2017 оны Дархан-Уул аймгийн Улсын төсөв, ОНХС-гийн хөрөнгө оруулалтын асуудлыг Сангийн яам болон холбогдох яамдтай хэлэлцэж Монгол Улсын нэгдсэн төсөвт суулгах ажилд хамгийн түрүүнд анхаарлаа хандуулна” гэв.

http://www.ikon.mn/n/sk0